Турција ја потврдува поканата до САД за преговорите за Сирија во Астана

Според турскиот министер за надворешни работи Мевлут Чавушоглу, прашањето да се поканат претставници на Вашингтон е дискутирано со Москва на дипломатско ниво.

Министерот за надворешни работи на Турција Мевлут Чавушоглу се договорил со руската страна во однос на поканата до САД за преговорите за сириското решение во главниот град на Казахстан. Ваква изјава министерот даде во разговор со новинарите.

„САД ќе учествуваат во преговорите во Астана“, изјави Чавушоглу. Според него, прашањето да се поканат претставници на Вашингтон е дискутирано со Москва на дипломатско ниво. „И ние не негираме дека Америка има улога во овој процес“, рече министерот, пренесува ТАСС.

Тој додаде дека „во оваа фаза сѐ уште се проценува кои страни можат да бидат застапени во Астана и на кое ниво“.

Притоа Чавушоглу истакна дека Анкара „нема да прифати учество во преговорите на курдските милитанти“. Како такви се подразбираат прогласените во Турција за терористички организации „Сили на народната самоодбрана“ и партијата „Демократски сојуз“. „Во преговорите треба да учествуваат оние страни кои ќе можат да дадат ефикасен придонес во регулирањето“, смета министерот за надворешни работи на Турција.

При користење на материјалите на Russia Beyond задолжителен е хиперлинк до изворот од кој е преземен материјалот.