Русија со проект од 240 милијарди долари за поврзување на Сибир и Арктикот

12 август 2016

Руска реч на македонски

Советот за безбедност на РФ му предложи на потпретседателот на руската влада Аркадиј Дворкович да го разгледа проектот „Единствена Евроазија“ – создавање нови транспортни коридори кои ќе ги поврзат Транссибирската и Бајкалско-амурската магистрала и Северниот морски пат, пишува весникот „Комерсант“.

Според подготвената документација, проектот „Единствена Евроазија“ ќе ја чини Русија меѓу 220 и 240 милијарди долари. Целта на проектот е создавање услови „за излегување на ново општествено-економско ниво преку подлабоко освојување на Сибир, Далечниот Исток и Арктикот“. Автор на проектот е членот на Руската академија на науки Александар Некипелов, пишува „Комерсант“.

Зошто Русија вложува во проектот Hyperloop

Интересен детаљ во планот е употребата на хибридни цепелини „Атлант“. Според мислењето на авторот на проектот, леталата ќе превезуваат товар меѓу Северниот морски пат и Транссибирската магистрала. Цената на еден цепелин, според првичните процени, изнесува околу 30 милиони долари. Притоа, еден цепелин може да замени до пет хеликоптери Ми-8. Првото летало треба да биде изградено до крајот на 2018 година.

Се соопштува дека идејата за „Единствена Евроазија“ била поддржана во Министерството за надворешни работи на РФ, Министерството за одбрана на РФ и Руската академија на науки. Притоа, се наведува дека во буџетот недостигаат средства за реализација на проектот „Единствена Евроазија“, поради што се бараат приватни инвеститори заинтересирани за учество во проектот.

Сите права ги задржува „Росијскаја Газета“.

економија во русија сибир арктик Накратко