Ѓукановиќ: Црна Гора нема да ѝ ја даде својата иднина на Москва

Црногорскиот премиер Мило Ѓукановиќ изјави пред новинарите во Тирана дека и покрај традиционално добрите односи со Русија, Црна Гора нема да ѝ ја даде својата иднина на Москва.

„Ние сакаме да ја преземеме одговорноста за својата иднина и да бидеме членка на Европската унија“, изјави премиерот на Црна Гора кој учествува во пролетната сесија на Парламентарното собрание на НАТО во Тирана. „Процесите на интеграција во ЕУ и НАТО се неразделни“, додаде тој, пренесува „Спутник“.

„Црна Гора ќе продолжи со процесот на реформи за да напредува кон европската иднина. Црна Гора е единствената земја каде што немаше војна по распадот на поранешна Југославија и ние сакаме нашата иднина да биде таква“, изјави Ѓукановиќ.

Црна Гора има аспирации кон НАТО и има јасна визија за нејзиниот придонес за стабилноста и безбедноста, рече Ѓукановиќ, додавајќи: „Членството во НАТО е од големо значење и може со сигурност да потврдам дека Црна Гора е на патот на евроатлантските структури, а потоа и на кон Европската унија“. За Ѓукановиќ, НАТО е гаранција за стабилноста на Балканот и во земјите од регионот.

Албанскиот премиер Еди Рама претходно изјави денеска дека целосна интеграција на Балканот во НАТО ќе биде стратешки и витални инвестиции.

„Тоа ќе биде истовремено и најочигледен одговор како на геополитички амбиции на другите актери во регионот, така и на ризиците и континуираните закани кои доаѓаат од Блискиот Исток и Северна Африка“, рече Рама.

Истакнувајќи дека со членството на Албанија во НАТО се поставија темелите за иднината на таа земја, Рама рече дека Тирана го поддржува членството на Црна Гора и Македонија во Алијансата.

Парламентарното собрание на НАТО, кое денеска го завршува тридневното пролетно заседание во Тирана, побара од земјите-членки да се спротивстават на воената решителност на Русија и подобро да го споделат товарот на заедничка одбрана. Претседателот на Парламентарното собрание на НАТО и американски адвокат Мајкл Тарнер рече дека „агресијата на Русија има цена“ и побара од европските партнери да ги зголемат буџетските расходи предвидени за одбрана.

 

Сите права ги задржува „Росијскаја Газета“.

Повеќе возбудливи стории и видеа на Фејсбук страницата на Russia Beyond-Македонија

Овој веб-сајт користи колачиња. Кликнете овде за да дознаете повеќе.

Прифати колачиња