Генерал Горенц: Русија зачекори во XXI век и стана закана

Командантот на Военото воздухопловство на САД во Европа Френк Горенц сѐ уште ја смета Русија за главна закана за регионот. Тој внимателно ги следи дејствијата на Русија и смета дека не треба да им се верува на нејзините зборови, вели тој во интервјуто за изданието „Дифенс Њуз“.

„Секој гледа на светот од своја гледна точка. Мојата гледна точка е во базата на ВВС Рамштајн во Германија. Гледам на исток и гледам сосем силна Русија“, изјави Горенц во интервјуто за изданието. Според него, Русија „продолжува да дејствува надвор од рамките на меѓународниот мировен поредок“, таа „не признава ништо и одрекува сѐ“. Освен тоа, таа „ги демонстрираше своите можности во логистиката и нанесувањето удари на големо растојание“.

„Не верувам во тоа што тие го кажуваат. Повеќе ме интересираат нивните дејствија. И засега ништо добро не видов“, истакнува генералот. Тој исто така потенцира дека САД прават многу нешта за да ги поддржат своите сојузници во Европа, но тие сметаат дека сето тоа е недоволно. „Сега е неважно дали Русија претставува закана број еден или не. Сметам дека е така. И таа закана станува сѐ посериозна“, вели Горенц.  

Генералот исто така истакнува дека „руската агресија“ го прави „неизбежно“ идното распоредување во Европа на авионите F-35. „Русија зачекори во XXI век. Се вооружува со многу силно оружје“, изјавува Горенц, истакнувајќи ги руските системи за ПВО и подготвеноста на Русија да инвестира пари во одбраната. „Мислам Путин, веројатно, се обидува да ги сведе на нула нашите обиди за зајакнување на борбената способност и оперативноста на реагирање“, потенцираше американскиот генерал.  

Горенц смета дека распоредувањето на F-35 во Европа, планирано за 2021 година, ќе им даде на САД и НАТО предност во воздух. „Лично, едвај чекам. Би сакал нивното распоредување овде да биде со повисок приоритет“, вели Горенц. 

Сите права ги задржува „Росијскаја Газета“.