Путин и Обама телефонски разговараа за Сирија и Украина

Лидерите на Русија и САД имаа телефонски разговор во кој дискутираа за резултатите од средбата на Меѓународната група за поддршка на Сирија, како и за ситуацијата во Украина во контекст на реализацијата на „Минската спогодба“.

Претседателот на Русија Владимир Путин и претседателот на САД Барак Обама во текот на телефонскиот разговор дискутираа за низа важни прашања, соопшти прес-службата на Кремљ, а пренесува РИА „Новости“.

Една од темите се однесувала на сириското решение.

„Во центарот на размената на мислења беа прашања во врска со сириското решение. Од двете страни е дадена позитивна оценка за резултатите од состанокот на Меѓународната група за поддршка на Сирија во Минхен на 11-12 февруари, кој ги потврди принципите и одредбите на резолуцијата на Советот за безбедност на ООН 2254 како во делот за хуманитарните аспекти и изработка на модалитетите на режимот за прекин на огнот, така и во прашањата за соработка за почнувањето на реалниот политички процес.  Изразена е, на пример, поддршка за напорите на двете целни групи – за прекин на огнот и хуманитарните аспекти“, се вели во соопштението.

Исто така било посветено и внимание на ситуацијата во Украина.

„Беше исто така разгледана и ситуацијата во Украина, пред сѐ, во контекст на реализацијата на договорениот во Минск на 12 февруари 2015 година пакет-мерки за регулирање на конфликтот“, се вели во соопштението.

Сите права ги задржува „Росијскаја Газета“.