Руски ракетен чамец принудил турски брод да го промени курсот

Ракетен чамец на Црноморската флота и чамец на крајбрежната стража на Русија принудиле турски брод кој го попречувал движењето на нафтена платформа да го промени курсот.

Нафтената компанија „Черноморнефтегаз“ соопшти дека турски комерцијален брод го попречувал пренесувањето на нафтена платформа на нова локација во Црното море и затоа два брода на руската воена морнарица го натерале турскиот брод да го промени курсот, пренесува „РT“.

Нафтената платформа без оглед на овој инцидент и неповолните услови за пловидба е безбедно пренесена на новата локација, соопштува компанијата.

Ова е втор поморски инцидент меѓу Русија и Турција за само два дена. Вчера рускиот патролен брод „Сметливи“ спречи судир со турски рибарски брод. 

Сите права ги задржува „Росијскаја Газета“.