Русија го пушти во работа вториот на светот реактор со брзи неутрони

Според зборовите на генералниот директор на „Росенергоатом” Андреј Петров, почетокот на работата на реакторот БН-800 е исклучителен настан за руската атомска енергетика.

Четвртиот енергетски блок на Белојарската атомска централа (во градот Заречни во Свердловската област) со реактор со брзи неутрони БН-800 е приклучен во мрежата и почна со производство на електрична енергија на Урал, соопшти концернот „Росенергоатом”.

Реакторот беше пуштен во работа во четвртокот, 10 декември во 21:21 по локално време. Новиот енергетски блок е приклучен на енергетскиот систем на минимално ниво од 235 мегавати.

„Денеска се случи значаен настан: на Урал се појави нов нуклеарен извор за производство на електрична енергија“, истакна директорот на Белојарската атомска централа Иван Сидоров, пренесува „Лента.ру.

Тој додаде дека претстои постигнување на капацитет од 50%, потоа почеток на пробна индустриска експлоатација и постигнување капацитет од 100%.

Според зборовите на генералниот директор на „Росенергоатом” Андреј Петров, почетокот на работата на реакторот БН-800 е исклучителен настан за руската атомска енергетика. Тој потсети дека претходниот енергетски блок со реактор од овој тип БН-600 почнал со работа пред 35 години.

Се претпоставува дека новиот енергетски блок ќе му додаде на енергетскиот систем на Урал веќе во декември оваа година околу 30 милиони киловат-часови.

Во моментов нуклеарни реактори со брзи неутрони се користат само во Русија, во Белојарската централа. Во Индија, Кина и Јужна Кореја ваквите енергетски блокови се во процес на изградба. 

Сите права ги задржува „Росијскаја Газета“.