Столтенберг: Русија не претставува воена закана за НАТО

Генералниот секретар на НАТО Јенс Столтенберг изјави дека Русија не претставува воена закана за ниедна земја-членка на Алијансата, пренесува ТАСС.

„Сведоци сме на голема неизвесност, неодреденост и растечка загриженост. Сепак, јас не гледам непосредна закана од Исток за ниту една држава на НАТО“, изјави Столтенберг.

Тој додаде дека односите меѓу Москва и Алијансата во иднина можат да се подобрат. „Наша цел е соработка со РФ и тоа е во интерес на НАТО и Русија“, истакна генералниот секретар на Алијансата.

„Алијансата е подготвена да ги заштити сите свои членки од која било закана. Знаеме дека заканите можат да бидат во секаков облик. Првпат во историјата Членот 5 беше применет како одговор на терористичкиот напад на 11 септември 2001 година во САД. Тоа значи дека принципот „сите за еден, еден за сите“ од Членот 5 е применлив во однос на сите видови закани. Кибер-војувањето може да предизвика иста реакција кај НАТОˮ, рече Столтенберг.

Тој додаде дека Алијансата мора подобро да ги разбере процесите кои се случуваат во светот, како и да ги зголеми активностите поврзани со собирање на разузнавачки податоци, за да биде подготвена да одговори на сите закани.

Сите права ги задржува „Росијскаја Газета“.