Повеќето Руси се уверени дека државата се движи во правилен правец, изјави Серускиот центар за истражување на јавното мислење (ВЦИОМ), а само 17% од граѓаните сметаат дека економската ситуација во државата е добра. Социолозите забележаа намалување на индексите на социјалната благосостојба, чии резултати беа највисоки во текот на летото. Според нив, проблемот е во падот на вредноста на рубљата и цените на нафтата. Експертите забележуваат дека откако Украина не е веќе топ-тема, луѓето почнаа да го насочуваат вниманието на „вистинските проблеми“.
Половина од Русите сметаат дека Русија се движи во правилен правец. Уште 37% „делумно се согласни со тоа“. Секој десетти граѓанин го смета спротивното. Индексот на задоволство од животот летово изнесувал 77 поени, а во октомври падна до 70.
Генералниот директор на ВЦИОМ Валериј Фјодоров смета дека падот на оптимизмот кај Русите е предизвикан со „промената на информативниот фон“. „Нафтата поевтинува, рубљата ја губи вредноста и стана јасно дека санкциите уште долго ќе траат“, изјави тој.
И покрај ова, повеќето Руси (73%) сметаат дека нивната материјална состојба не е добра, но не е ниту лоша, 13% сметаат дека имаат добра материјална состојба, а само 14% изјавиле дека живеат сиромашно.
„Граѓаните веќе го насочуваат своето внимание на вистинските проблеми, а украинската криза полека ја снемува од медиумите“, изјави политикологот Константин Калачев. Според него, ако порано Русите биле загрижени за ситуацијата со патиштата, сега на прво место е растот на цените. „Се менува хиерархијата на проблемите. Наскоро првото место ќе го заземе проблемот со платите кои престанаа да растат“.
Сите права ги задржува „Росијскаја Газета“.
Претплатете се
на нашиот билтен!
Добивајте ги најдобрите стории на неделата директно во вашето сандаче