Почина Мирослав Лазански, амбасадор на Србија во Русија

Мирослав Лазански имаше 70 години. Роден е во Карловац во семејство на словенечки офицер и Србинка, основно образование завршува во Карловац, гимназија во Требиње, а студира право во Загреб. Во 1977 година Мирослав Лазански служи воен рок во пешадијата на ЈНА.

На просторите на поранешна Југославија кариерата на идниот дипломат започнува со новинарство. Мирослав Лазански пишува колумни за угледни хрватски изданија. Во февруари 1991 година се преселува во Белград и станува редовен соработник на весникот „Политика“ и бројни други медиуми. Има објавено осум книги и напишано сценарија за десетици телевизиски серии.

Мирослав Лазански работи како воен репортер и престојува во воените зони во Авганистан, Бејрут, Чеченија, Заир (сегашна ДР Конго), Либија,  ги следи настаните од иранско-ирачкиот конфликт, операцијата „Пустинска бура“, граѓанската војна во Босна и Херцеговина, Словенија, на Косово и Метохија. Настапува на телевизија како експерт за вооружување и геополитика.

Пред две години, во 2019 година, Мирослав Лазански стана амбасадор на Србија во Русија. Според него, тоа се случило за време на процутот на односите меѓу двете земји.

„Односите меѓу Србија и Русија денес го достигнаа врвот. Политичките односи никогаш не биле подобри. Економската соработка се развива, а уште повеќе - воената. Тие односи, како и во љубовта, треба да бидат поддржани од двете страни, не може да биде еднострана љубов. Мислам дека во тој поглед се движиме во вистинската насока. Покрај тоа, одличниот однос меѓу Александар Вучиќ и Владимир Путин, исто така, игра улога“, зборуваше Мирослав Лазански.

Дипломатот нагласи дека Русија за него е повеќе отколку само место на вршење функција.

„Тоа е голем пријател на Србија и српскиот народ, како во минатото, така и денес. Ова е најголемата земја на светот, а да се биде амбасадор во Русија, пред сè, голема чест за секого. Русија е светот“, рече Мирослав Лазански во интервју за порталот „Балканист“.

За време на неговата новинарска кариера, Мирослав Лазански интервјуира тројца маршали на Советскиот Сојуз, комуницира со целото воено раководство на земјата, ги следи сите настани што се одиграа во текот на Студената војна, односите меѓу СССР и САД, односите меѓу земјите од Варшавскиот пакт и НАТО.

„Не постои ниеден друг новинар на светот кој интервјуирал тројца советски маршали - [Сергеј Фјодорович] Ахромеев, [Виктор Георгиевич] Куликов, [Дмитриј Тимофеевич] Јазов. И, исто така, првиот човек на КГБ, генерал [Владимир Александрович] Крјучков, командантот на Воената морнарица на СССР, адмирал [Владимир Николаевич] Черњавин, началникот на Генералштабот на Вооружените сили на Русија, генерал на армија [Николај Егорович] Макаров, рускиот министер за одбрана, генерал [Игор Николаевич] Родионов, и на крај, претседателот Путин“, гордо зборуваше амбасадорот на Србија во Русија.

Мирослав Лазански, исто така, интервјуираше двајца врховни команданти на НАТО, военото и политичкото раководство на СССР и Русија, САД, НАТО, Велика Британија, Норвешка, Унгарија, Романија, Бугарија, Авганистан, Јапонија, ЕУ, Италија, Јужноафриканската Република, Словенија, Белорусија, Јемен, Украина, Австрија, Сирија.

При користење на материјалите на Russia Beyond задолжителен е хиперлинк до изворот од кој е преземен материјалот.