7 прашања за Спутник V, првата руска вакцина за КОВИД-19

Сергеј Маглавко/TASS
Колку земји ја купуваат вакцината и какви несакани ефекти има таа?

1. Како се спроведува кампањата за вакцинација во Русија?

Вакцинацијата во Русија е бесплатна и се спроведува со вакцината „Спутник V“ од Гамалеја. Луѓето во секој руски регион можат да се регистрираат за вакцинација преку веб-страницата Госусулуги (односно „државни услуги“) или преку телефон. Во Москва, исто така, можете да добиете вакцина не само во клиниките, туку и во трговски центри, по принципот „прв дојден прв услужен“ - потребен е само пасош.

Според раководителот на Роспотребнадзор (Руска агенција за заштита на правата на потрошувачите), Ана Попова, до есента 2021 година, 60% од населението во земјата ќе бидат вакцинирани (од 146 милиони население во Русија). Експертите велат дека овие проценки се реални доколку луѓето бидат подготвени да ја примат: „Главната работа е луѓето да ја разберат потребата да се вакцинираат“, рече Лариса Попович, директор на Институтот ХСЕ за здравствена економија.

2. Дали има доволно дози?

Пункт за вакцинација во трговски центар во Москва

Русија веќе произведе 6,5 милиони дози на „Спутник V“ и ќе направи уште околу 33 милиони до крајот на март 2021 година, смета првиот човек на Министерството за индустрија и трговија Денис Мантуров. „Ние ќе испратиме 2,1 милиони дози во руските региони до крајот на јануари, уште 5,7 милиони дози во февруари и речиси 9 милиони дози во март“, рече тој.

Во меѓувреме, некои региони, вклучително, Пермскиот регион, Ленинградскиот регион и Волгоградскиот регион објавија дека имаат недостиг. Властите велат дека дефицитот се должи на огромната територија на Русија и фактот што производството на лекот сè уште не го достигнало целиот капацитет. Експертите забележуваат и дека нема доволно медицински персонал во регионите.

Највисока достапност на вакцината има во Москва, Московскиот регион, Сахалин, автономниот округ Ненец и Чукотка (интересно, последните три се меѓу најоддалечените региони во Русија и далеку од Москва).

3. Колку Руси сакаат да се вакцинираат?

Според новинската агенција ТАСС, заклучно со 29 јануари 2021 година, 2 милиони луѓе веќе примиле вакцина, сепак, точниот број по региони сè уште не се знае. Исто така, не е јасно дали оваа бројка вклучува странски државјани.

Регионалните власти ги споделија следниве бројки: 300.000 вакцинации во Москва од 12 милиони жители до 31 јануари 2021 година, 50.000 вакцинации во Московски регион од 7,6 милиони луѓе до 25 јануари, 62 000 вакцинации во Санкт Петербург од 5 милиони луѓе до 30 јануари .

Во меѓувреме, според анкетите на ВЦИОМ и Левада Центар, само 38% од Русите сакаат да ја примат вакцината, а повеќето од нив сакаат вакцина од руско производство. Вакцинацијата најмногу ја очекуваат граѓани на возраст од 55 години и постари, додека повеќето Руси на возраст под 34 години не сакаат да ја примат вакцината.

Причините за одбивање вклучуваат желба да се почека до крајот на испитувањата, страв од несакани ефекти или едноставно негирање на ефикасноста на какви било вакцини. Експертите исто така веруваат дека на луѓето им недостасува мотивација, затоа што сепак им е кажано да носат маски и да ги почитуваат другите ограничувања дури и по приемот на вакцината.

4. Дали се вакцинираше Владимир Путин?

Сè уште не, но тој рече дека планира да го стори тоа. Во средината на декември 2020 година рускиот претседател рече дека не ја примил вакцината поради неговата возраст. Во тоа време, само луѓето на возраст од 18 до 60 години имаа дозвола да се вакцинираат, додека Путин има 68. Денес, „Спутник V“ е одобрен и за лица постари од 60 години. Според портпаролот на Путин, Дмитриј Песков, претседателот самиот ќе ги информира сите кога ќе се вакцинира.

5. Каде точно се произведува „Спутник V“?

Во моментов, вакцината „Спутник V“ се произведува во 6 погони во Русија кои се наоѓаат во Москва, Владимирскиот регион и во Санкт Петербург. Наскоро се планира отворање на 7 погон во Јарослављ. Во декември 2020 година беше објавено дека „Спутник V“ се произведува и во Индија (5 погони), Јужна Кореја (1 погон), Бразил (1 погон) и Кина (3 погони) за побарувачката за извоз.

На крајот на јануари 2021 година, производството на руска вакцина започна и во Казахстан - само за локална употреба.

6. Кои други земји ја користат „Спутник V“?

Вработените на аеродромот ја растоварат првата пратка на руската вакцина Спутник V за КОВИД-19 откако таа пристигна на меѓународниот аеродром во Ел Алто, Боливија, на 28 јануари 2021 година.

Повеќе од 40 земји покажаа интерес за руската вакцина, откако веќе нарачаа 1,2 милијарди дози. Извозната цена е помала од 10 американски долари по доза, што е половина од цената на вакцините на Pfizer и Sinopharm и 2,5 пати поевтина од онаа на Moderna.

Во меѓувреме, „Спутник V“ е официјално регистрирана во 16 земји, покрај Русија:

Белорусија
Аргентина
Боливија
Србија
Алжир
Палестина
Венецуела
Парагвај
Туркменистан
Обединетите Арапски Емирати
Унгарија
Пакистан
Иран
Казахстан
Тунис
Гвинеја

Првата странска држава што започна да ја користи вакцината „Спутник V“ беше Белорусија: нејзините власти потпишаа договор за 170.000 дози. Вакцинацијата таму во моментов се спроведува само меѓу медицинските работници.

Втората земја беше Аргентина: на крајот на декември 2020 година се согласи да купи 10 милиони дози. Претседателот Алберто Фернандез и потпретседателката Кристина Кирхнер тврдат дека веќе биле вакцинирани.

Третата земја ќе биде Боливија: земјата треба да добие 5.2 милиони дози вакцина до крајот на мај. Раководството на земјата исто така објави подготвеност да се вакцинира со „Спутник V“.

Во меѓувреме, Србија нарача 6.5 милиони дози од различни производители, вклучувајќи 2 милиони дози „Спутник V“. Според српското Министерство за здравство, 40% од граѓаните би сакале да се вакцинираат со руската вакцина, додека 28% со Pfizer, а други велат дека немаат никакви преференции.

На 1 февруари 2021 година, масовна вакцинација започна и во Казахстан.

7. Какви несакани ефекти има „Спутник V“?

Досега не се регистрирани сериозни несакани ефекти. Најчесто, луѓето чувствуваат симптоми слични на настинка: треска, слабост, главоболка неколку дена. Според аргентинското Министерство за здравство, само 1% од вакцинираните покажале несакани ефекти: треска, главоболка, реакции на кожата околу областа на инјекцијата.

Меѓу официјалните контраиндикации за вакцинацијата се мозочни удари, туберкулоза, хепатитис Б и Ц, сифилис, како и ХИВ. Руското Министерство за здравство вели дека вакцинацијата може да биде ризична за лица со онколошки болести, бидејќи немало доволно испитувања.

При користење на материјалите на Russia Beyond задолжителен е хиперлинк до изворот од кој е преземен материјалот.

Повеќе возбудливи стории и видеа на Фејсбук страницата на Russia Beyond-Македонија

Овој веб-сајт користи колачиња. Кликнете овде за да дознаете повеќе.

Прифати колачиња