Како живеат 10 најголеми руски градови во пандемијата на коронавирусот (ФОТО)

Александр Авилов/Moskva Agency; Артур Лебедев/Sputnik

Кон крајот на март поголемиот број руски градови поради епидемијата од коронавирусот воведoa мерки за самоизолација. Тоа значи дека луѓето треба да останат дома, и да ги напуштаат своите домови само за да набават храна и лекови. Овие градови во кои обично има метеж, сега изгледаат пусто.

1. Грозни

Во центарот на Грозни

Почнувајќи од 5 април, Чеченија ги затвори границите за влез и за излез на приватни возила. Забраната не се однесува само на итните служби и на транспортот на неопходната стока. Волонтери со помош на мегафони ги потсетуваат граѓаните да останат дома. До 13 април утрото во Чеченската република се регистрирани 49 случаи на инфекција, 5 лица починаа, а 15 се пуштени од болница.

2. Казањ

Кремљовската улица во Казањ, инаку обично преполна со луѓе

Во Татарстан можете да излезете од дома само ако испратите СМС со својот број на лична карта, местото на изолација и причината за напуштање на домот. Доколку надлежните оценат дека причината е оправдана, добивате дозвола за излез по пат на СМС. Едно лице може да добие најмногу две дозволи дневно. Без дозвола можете да излезете само да го прошетате кучето (не подалеку од 100 метри од домот) или до најблиската продавница. Во Татарстан се регистрирани 84 случаи на инфекција, досега нема смртни случаи.

3. Сочи

Преграден излез на брегот на Црно море.

Туристичкиот град Сочи до 1 јуни ги затвори сите свои спортски и туристичките објекти. Хотелите не смеа да примаат гости во текот на режимот на самоизолација. Во Краснодарскиот крај до 13 април има потврдено 210 случаи на инфекција, а три лица починаа.

4. Нижни Новгород

Жител на Нижни Новгород прима QR-код за да може да го напушти домот

Во Нижни Новгород жителите мораат на сајтот на градската управа да симнат QR-код и да ѝ го покажат на полицијата на својот смартфон во случај да ги запре. Код е потребен дури и ако сакате само да исфрлите смет, но и тогаш се добиваат 30 минути излез. За купување намирници, пак, има најмногу три часа. Дозвола може да се нарача и преку телефон. Таа ќе стаса по СМС. Во регионот до 13 април се регистрирани 224 случаи на инфекција, а досега починаа четири лица.

5. Екатеринбург

Во близина на Екатеринбург

Во престолнината на Урал сите паркови и продавници кои не продаваат храна се затворени, а луѓето ги потсетуваат да останат дома. Овој мегалополис се ослободи од сообраќајните метежи, што ги воодушевува љубителите на брзо возење. Според локалните медиуми, првиот ден од изолацијата камерите на улиците се забележани 8.000 случаи на пречекорување на брзината! Во Свердловската област до 13 април се регистрирани 85 случаи на зараза, додека 37 лица закрепнале. Нема смртни случаи.

6. Владивосток

Пробен лет на дрон кој треба да го следи режимот на самоизолација во Владивосток

Од 7 април Приморскиот крај на Русија воведе СМС-систем за оние што мораат да излезат од дома по работа. Освен дозволата што ја добивате по СМС, лицето е должно со себе да носи лична карта и документ до работодавачот. Почитувањето на режимот на самоизолација се следи со помош на дронови. До 13 април се регистрирани 28 случаи на зараза, а двајца се починати.

7. Краснојарск

Театарскиот плоштад

Жителите на овој сибирски град кои мораат да одат на работа треба да добијат дозвола од својот работодавач. Сите останати мораат да останат дома во самоизолација. За некој во итен случај да го напушти домот мора да напише објаснување и да ѝ го покаже на полицијата. Инаку може да бидете казнети со 3.000 рубли (околу 39 американски долари). Во Краснојарскиот крај до 13 април се регистрирани 110 случаи на инфекција. Засега нема смртни случаи.

8. Санкт Петербург

Дворцовиот плоштад во Санкт Петербург

За многу туристи омилениот руски град ги забрани сите активности на отворено, вклучувајќи и екскурзии. На луѓето им се препорачува на улица да држат растојание од 1.5 метри. Училиштата и универзитетите работат само онлајн. Многу линии од јавниот сообраќај се укинати (освен метрото). Санкт Петербург е третото место по бројот на заразени во Русија. До 13 април коронавирусот е потврден кај 678 лица. Починати се 4 лица.

9. Котелники

Паркинг кај трговскиот центар Мега во близина на Москва

Московската област е втора според бројот на заразени во Русија. До 13 април потврдени се 1855 случаи на зараза и 19 смртни случаи. Во овој регион се наоѓаат некои од најголемите трговски центри во земјата, а сега сите тие се празни. Работат само продавниците за храна и аптеките, но и во нив сега има малку луѓе.

10. Москва

Пред метро-станицата Мајаковскаја

Две третини од случаите на инфекција со коронавирус во Русија се регистрирани во Москва: 11.513 од вкупно 18.328 во Русија и 82 смртни случаи од вкупно 148 на ниво на цела Русија. Во руската престолнина повеќето луѓе работат од дома, а продавниците и рестораните преминаа на достава до дома. Додека граѓаните се во своите домови, службите спроведуваат дезинфекција на улиците и на јавниот сообраќај. Бројот на патници во метрото и во автобусите е намален за 80%, бројот на приватни возила на улиците е намален за 50%, а бројот на сообраќајните несреќи во руската престолнина е намалено за 86% во споредба со истиот период минатата година. За прекршување на режимот на самоизолација на граѓаните им следува казна од околу 4.000 (55 американски долари).

При користење на материјалите на Russia Beyond задолжителен е хиперлинк до изворот од кој е преземен материјалот.

Повеќе возбудливи стории и видеа на Фејсбук страницата на Russia Beyond-Македонија

Овој веб-сајт користи колачиња. Кликнете овде за да дознаете повеќе.

Прифати колачиња