Сибирски хирург го користи годишниот одмор да патува по светот и бесплатно да оперира деца

Максилофацијалниот хирург од Детската болница во рускиот град Новосибирск Михаил Колибелкин помина уште еден годишен одмор работно, поточно на пат. Во Алтајските села прегледа деца кои потоа ги оперираше.

Колибелкин, кој оваа година е прогласен за најдобар лекар во Новосибирската област, веќе со години патува по градовите ширум Русија и светот (Мароко, Кенија, Јордан) за бесплатно да прегледа и лекува деца на кои им се потребни сложени операции на лицето.

Летово докторот престојуваше во Горно-Алтајск каде се сјатија деца од оддалечените села на Република Алтај.

„Заминувам на терен, ги прегледувам децата и ги пронаоѓам оние кои можат да се вклучат во акцијата (на Меѓународната добротворна организација Операција „Насмевка”). Постојат разни критериуми според кои се одлучува кој е за операција, а кој не е. На оние кои не се им давам совети, да речеме моментално да применат ортодонтска терапија, или предлагам операција која може да се изврши во блиска иднина. Додека останатите доаѓаат кај мене (во болницата)”, објаснува докторот.

Според него, за преглед првин се пријавиле стотина пациенти, но на крај до консултации стигнале дваесетина, меѓу кои на половина од децата навистина им била потребна операција. Покрај Колибелкин, пациентите бесплатно ги оперираа и лекари од Минск и Иркутск.

„Претходно секој годишен одмор го користев одејќи на такви патувања, а сега одвреме-навреме. Се случуваше одморот и акцијата да не се поклопат, така што тогаш земав неплатено, пишував изјава на работа и заминував“, вели лекарот, нагласувајќи дека на таквите патувања му се платени патот и храната, но не и самото лекување на децата.

Михаил Колибелкин работи во Детската болница во Новосибирск од 1987, а од 1992 година е началник на Одделението за максилофацијална хирургија. Во истата болница работи и неговиот син Константин, исто така максилофацијален хирург кој како и татко му патува по светот за бесплатно да лекува деца.

При користење на материјалите на Russia Beyond задолжителен е хиперлинк до изворот од кој е преземен материјалот.