Не пропуштајте!
Придружете се на Russia Beyond на Телеграм за повеќе есклузивни содржини
Ова е национално јадење на угрофинскиот народ од Република Мариј Ел. На древен угрофински јазик, „pod“ значи „бакрач“, а „kagyl“ е „пита“. Затоа „поткоголите“ понекогаш се опишуваат како „варени пирошки“.
„Поткоголите“ се вид полнети варено тесто слично на италијанските равиоли, турските манти, руските пељмени. Можат да бидат големи и до 4,5 сантиметри до големина на дланка.
Понекогаш во тестото се додава ‘ржано брашно заедно со пченично. Се смета дека поткоголите треба да се јадат веднаш по варењето. Односно, да не се чуваат во замрзнувач и да се приготвуваат во количина која е потребна веднаш да се изедат. Меѓутоа, денес во продавниците во Русија можете да најдете и замрзнати поткоголи.
Легендата за потеклото на Маријците е поврзана токму со ова јадење. Според митот, ќерката на богот Јул ги пробала поткоголите на земјата и не сакала да се врати на небото, туку останала со својот љубовник Мариј. Од нивниот брак настанал народот.
Така што можеме да претпоставиме дека се работи за јадење старо повеќе векови. Порано филот се правел од месо од дивеч како зајак или јазовец со додавање кромид или житарки.
Постојат неколку видови на полнење, секое со свое име. Ние заедно ќе подготвиме поткоголи со компири и сирење, кои се нарекуваат „тувиртиш подкогило“.
За најдобар вкус, користете ситно домашно сирење (во Македонија познато како швапско сирење). Ако имате помалку масно сирење, во филот можете да додадете малку путер. Во секој случај, препорачувам да додадете путер. Исто така, подобро е да додадете повеќе компири во филот.
Овој фил не бара долго варење, па начинот на полнење и спојување на тестото е специфичен. Инаку, вообичаено е кај поткоголите спојот да се прави во вид на плетенка, така што филот безбедно е сместен внатре и не се излева при варењето. Но, така настанува дебел раб кој бара подолго варење, што е посоодветно за фил од месо. Затоа во случај на фил од компири и сирење се користи едноставно рамно спојување на рабовите на тестото.
За поткоголите се користи бесквасно тесто. Се расукува и се дели на парчиња од по 20 грама. Потоа секое парче се прави потенко.
Поткоголите се печат во рерна, се варат во солена вода или на пареа. Јадењето обично се служи со павлака, путер и млад кромид.
Тесто:
Пченично брашно - 145 g
Јајце – 1 пар.
Вода – 5 лажици
Сол – 1/2 лажичка
Фил:
Компир - 2 големи (за 170 g пире од компири)
Швапско сирење (домашно ситно сирење) - 100 g
Путер - 30 g
Сол и бибер по вкус
За сервирање:
Павлака - 50 g
Путер - 10 g
Млад кромид - 10 g
Измешајте ги состојките за тестото во повеќенаменски миксер или рачно.
Замесете тврдо тесто. Тестото замотајте го во проѕирна фолија и оставете го да отстои половина час.
Излупете го компирот, исечете го на четвртинки и сварете го во солена вода.
Подгответе го сирењето. Користете тнр. швапско или ситно домашно сирење. Јас го протерувам низ сито за да добијам хомогена маса.
Варениот компир процедете го, додајте му путер и изгмечете го. Додајте го сирењето на компирот и измешајте. Додајте сол и бибер и мешајте додека не стане мазно.
Тестото смотајте го во ролна и сечете го на парчиња од околу 20 грама.
Истенчете ги едно по едно. Додека работите со едно парче тесто, останатите покријте ги со фолија да не се сушат.
На половина од расуканото тесто ставете фил.
Преклопете и спојте ги рабовите. Ќе добиете 12 големи парчиња.
Варете во солена вода. Извадете ги по две минути откако ќе испливаат на површина.
Сервирајте ги топли веднаш по варењето со путер, павлака и млад кромид.
При користење на материјалите на Russia Beyond задолжителен е хиперлинк до изворот од кој е преземен материјалот.
Претплатете се
на нашиот билтен!
Добивајте ги најдобрите стории на неделата директно во вашето сандаче