7 највкусни специјалитети на руската црноморска кујна

Legion Media
Руската црноморска кујна понекогаш може да ве потсети на медитеранската... или на кавкаската... или на татарската. Дознајте кои се разликите меѓу нив!

Голем број народи некогаш живееле на рускиот брег на Црното море, меѓу кои и Грци, Ерменци и Адигејци. Секој од нив дал свој придонес на локалната кујна. Кујната на брегот на Црното Море се базира на сезонски зеленчук (модар патлиџан, пиперка, домат, лук, кои се користат свежи или термички обработени), овошје (кајсии, смокви, грозје), јаткасти плодови, младо домашно сирење и лути сосови. А месото и рибата обично се подготвуваат на скара. Така е, тука ќе најдете раженчиња на секој чекор!

1. Пржена ситна риба

Барабулка (барбун), ставрида (скуша) и хамса (инчун) се популарен улов од водите на Црното море. Овие риби се ситни, имаат помалку коски и лесно се подготвуваат. Локалните жители најчесто само ги валаат во пченкарно брашно и ги печат во големи количини на масло. Современите ресторани во туристичките места ги печат барабулката и ставридата во рерна и ги послужуваат со салата, лимон и оризов леб.

2. Рапани

Главен деликатес на црноморскиот брег се школките рапани. Нивното месо е многу меко доколку добро ги подготвите. Тајната е во тоа што треба да ги варите или динстате најмногу 5 минути. Рапаните се најдобри во комбинација со свеж или варен домат, кромид и павлака.

3. Чебурек

Оваа голема пита со месо е култно јадење во кујната на Кримските Татари, кое по должината на целиот брег на Црното море стана популарна улична храна. Чебурекот се прави од тенко бесквасно тесто и се пече во длабоко масло. Она што го прави незаборавен е исклучително вкусното полнење од месо.

4. Чурчхела

Јаткасти плодови нанижани на жица и потопени во гроздов или друг овошен сируп се нарекуваат чурчхела. Оваа слатка од грузиско потекло е МНОГУ популарна на потегот од Анапа до Сочи. На секоја плажа и секој пазар локалните продавачи нудат домашна чурчхела, а варијациите на основниот рецепт се бескрајни. Ореви, лешници или бадеми? Сок од грозје или праски? Сé е превкусно...

5. Сорбе и баклава

Во Русија ваквите слатки се нарекуваат „источни“ и ги има преку сто различни видови. На брегот на Црното Море на секој пазар ќе најдете сорбе, нугат и алва направени од овошје и јаткасти плодови. Изгледаат како големи бонбони што се сечат и се продаваат на грам, а парчињата се прилично големи.

Баклавата е исто така ориентална слатка. Тоа е пита со ореви и прелив од мед.

6. Шашлик и љуљ-кебап

Месо нанижано на стапчиња е едно од највкусните јадења на црноморската кујна. Шашликот обично се прави од сецкано свинско или јагнешко месо, додека љуљ-ќебапот е еден вид ќебап прободен со стапче. Во кафулињата на брегот раженчињата обично се служат во чинија со лаваш (сплескан леб), зелена салата, домат и краставица и со лут сос од аџика.

7. Најсеверниот чај

Во одморалиштето Мацеста во близина на Сочи се одгледува најсеверниот чај на светот. Тука зимите се благи, но климата за одгледување чај е сè уште прилично остра. Меѓутоа, со вековите, локалните плантажи се навикнале на руските услови и чајот од Мацеста стана вистински црноморски специјалитет. Преполн е со витамин Ц и танин и затоа треба кратко време да отстои во врела вода, во спротивно станува премногу горчлив.

 

 

При користење на материјалите на Russia Beyond задолжителен е хиперлинк до изворот од кој е преземен материјалот.

Повеќе возбудливи стории и видеа на Фејсбук страницата на Russia Beyond-Македонија

Овој веб-сајт користи колачиња. Кликнете овде за да дознаете повеќе.

Прифати колачиња