Не пропуштајте!
Придружете се на Russia Beyond на Телеграм за повеќе есклузивни содржини
„Најдостоен меѓу достојните, жесток патриот на нашата земја, вистински борец-новинар, вистински болшевик со младо и топло срце“, вака на 22.5.1940 година во „Комсомољскаја Правда“ го опишуваат херојот на Советскиот Сојуз Валентин Пургин.
Написот детално ги опишува подвизите на бестрашниот војник на боиштата на советско-финската војна. Сепак, наскоро станува јасно дека во реалноста херојот воопшто не е херој, туку вистински измамник и криминалец, кој дури и не ја помирисал војната. Но, како може такво лице да добие највисока награда во земјата?
Валентин Пургин не е вистинското име на лажниот херој. Кога имал 23 години, Владимир Голубенко веќе имал две пресуди за кражба и измама, а исто така успеал и да избега од работнички логор и решил итно да го смени својот идентитет.
Набргу по бегството, Голубенко добил фалсификувани документи и добил нов пасош со име Валентин Пургин. Измамникот делувал дрско и одлучно. Откако доставил лажен сертификат за обука на Академијата за воен транспорт, тој започнал да работи како дописник за еден весник во Свердловск (сега Екатеринбург).
Големите амбиции го одведуваат Пургин во главниот град. Таму тој запознал луѓе кои му биле од корист и на крајот се нашол во еден од водечките весници во СССР - „Комсомољскаја Правда“.
Битката кај Халкин Гол
Виктор Темин/SputnikБез да заврши ниту средно училиште, Пургин направил добра кариера. Наскоро обичен дописник се нашол на местото заменик-шеф на воениот оддел на весникот.
Лажниот Валентин упорно градел околу себе мистериозна слика на човек поврзан со државните безбедносни агенции на НКВД, разузнавач кој не треба многу да зборува. Тој дури и отишол во редакцијата со Орден на црвеното знаме на градите. На сите прашања „За што?“ тој важно одговарал: „Ние не сме наградени за ништо“.
Подоцна станало јасно дека неговата мајка, која ја вработил како чистачка во просториите на Президиумот на Врховниот совет на СССР, ги украла книгите за наградите и самите наредби. Граверот, пријател од криминалниот свет, исто така му помогнал да ги подготви документите.
За време на советско-јапонскиот конфликт покрај реката Халкин Гол во летото 1939 година, Пургин измислил барање од Народниот комесаријат за одбрана на СССР за потреба да биде испратен на Далечниот исток и го испратил до редакцијата. Се вратил од службено патување со блескавиот Орден на Ленин.
Кога Комсомољскаја Правда добила инструкција (повторно фабрикувана) да го испрати Валентин Пургин на фронтот на советско-финската војна, никој во редакцијата не поставувал непотребни прашања.
Но, овој пат Пургин не мислел да патува никаде. Се преселил во станот на негов пријател во Москва и заедно со него ги пиел по ресторани дневниците што ги добивал за службено патување.
Тогаш, измамникот бил засенет од идејата да стане херој на Советскиот Сојуз. За време на кратката советско-финска војна, повеќе од четиристотини луѓе ја добиле оваа титула, а Валентин Пургин сметал да се изгуби во толпата луѓе.
Во март 1940 година Одделот на народниот комесаријат на морнарицата, надлежен за наградите, на украдени бланка на 39 дивизија добива предлог со неточни податоци за него да му се додели на Валентин Пургин Ленинов орден и Орден на Црвената ѕвезда.
Вработените во одделот за награди, импресионирани од списокот на заслугите на претендентот, не го спровеле дури ни прописот за проверка и на 22 април бил објавен указот, со кој на измамникот му била доделена титулата Херој на Советскиот Сојуз.
Точно еден месец подоцна, Комсомољскаја Правда објави статија за подвизите на „најдостојниот меѓу достојните“ за време на војната со Финците, раскажана според зборовите на самиот Пургин. Во неа, бестрашниот херој уништува непријателски ДОТ (долгорочна огнена точка или бункер), жестоко се брани кога е нападнат од непријателските војници, заробува двајца затвореници и, откако три дена бил изложен на страшен студ, сепак успева да стигне до своите...
Овој пофален напис прави лоша шега со арогантниот херој. Од објавената фотографија, офицерите на НКВД кои го придружувале во кампот, како и жртвите на неговите злосторства, го препознаваат крадецот и измамникот Владимир Голубенко.
По многу внимателна истрага, Голубенко-Пургин бил уапсен и му била одземена титулата Херој на СССР. Во ноември 1940 година, тој бил стрелан.
По оваа скандалозна приказна, системот за проверка на кандидати за високи награди бил комплетно сменет. И, иако во следните години наградите не поминале без грешки, ваквите очигледни измамници како Пургин не добиле титула Херој на СССР.
При користење на материјалите на Russia Beyond задолжителен е хиперлинк до изворот од кој е преземен материјалот.
Претплатете се
на нашиот билтен!
Добивајте ги најдобрите стории на неделата директно во вашето сандаче
