Запознајте го рускиот сликар кој комбинира Ренесанса и иконопис

15 јули 2022

Александра Гузева

Италијанската уметност, средновековното руско сликарство и авангардата на ХХ век - сето тоа се стопило во творештвото на самобитниот сликар Андреј Ремњов.

Ве очекуваме на Телеграм-каналот https://t.me/rb_makedonija
Вклучете го во пребарувачот „Show notifications“ (дозволи известувања) за нашиот сајт!
Пријавете се на нашата неделна мејлинг листа https://mk.rbth.com/subscribe

Ремњов е роден во Московската област, во гратчето Јахрома, каде што пејзажите, како што самиот тврди, „наликуваат на оние на Бројгел“. Завршува сликарско училиште, а потоа во раните 1990-ти учествува на културни размени и изложби во странство. Неговите дела се изложувани во галерии во Германија, Кипар, Холандија, Франција, Италија и Шпанија.

Ремњов смета дека еден од најважните правци во неговото творештво било проучувањето на иконописот под раководство на отец Вјачеслав, иконописец од Спасо-Андрониковиот манастир во Москва, познат по фреските на легендарниот Андреј Рубљов, најголемиот средновековен руски иконописец.

„Ги копирав најдобрите примери на староруското сликарство од XV-XVII век. Во исто време работев и на моите слики. Во тој период конечно се оформи мојата сопствена сликарска техника“, вели Андреј.

Денес, творештвото на Андреј се базира врз спој од неколку стилови и правци во светската уметност. На неговите платна се препознаваат мотиви на италијанската Ренесанса и руската иконописна традиција, како и на модернизмот и авангардата.

Рускиот сликар бил особено под влијание на мајсторите на Ренесансата. Тој смета дека руската и италијанската култура се нераскинливо поврзани: „Московскиот Кремљ, Успенскиот храм и Архангелскиот храм се изградени од италијански архитекти и тоа е нераскинлив дел од руската култура“.

Многу руски сликари од XIX век отишле во Италија да учат и да го усовршат своето мајсторство. Ремњов ја наследил таа традиција – и тој често патува по Италија и наоѓа инспирација во пејзажите на Поцуоли и Неапол, како и во сликите на Пјеро дела Франческа и Беноцо Гоцоли. Под впечаток на тие патувања настана цела серија од неговите дела со наслов „Лицето на стихијата“.

Мерно парче ткаенина, 2020.