Хеви-метал од Рујна во слава на Русија

Групата Аркона, која своето име го добила во чест на легендарниот град-храм во кој се наоѓало најголемото словенско светилиште на богот Световид на островот Рујна (денешен германски Руген), во моментов е веројатно најпопуларната хеви-метал група од Русија, а неодамна таа ја одбележа 10-годишнината од своето постоење.

Групата негува посебен стил – „словенски фолк-метал“ кој е популарен меѓу оние кои го сакаат „тешкиот“ звук и историските реконструкции (а, во Русија, според различни проценки, ги има помеѓу 1.5 и 3 милиони). Овој стил во себе содржи елементи на традиционалните хеви-метал стилови како што се блек, дет, симфо и дум. Сепак, во основата на мелодиите на оваа група доминираат словенските фолклорни мотиви и квалитетниот аранжман што подразбира користење традиционални словенски инструменти како што се флејтата, дудукот, кавалот, гуслата итн. За естетското доживување придонесуваат и необичните текстови со раскажувачки карактер посветени на херојските дела на старите Руси, на времето на претхристијанска Русија и на словенските богови Сварог, Перун, Дажбог, Хорс, Род и други.

Навистина делува мошне впечатливо. Пејачката со златна коса и строги црти на лицето, Марија Архипова (која воедно е и лидер на групата), облечена е во педантно сошиена автентична облека од крзно и кожа со словенски и рунски орнаменти која е украсена со амајлии и со талисмани. Во своето пеење таа користи чист вокал карактеристичен за руските народни песни, окање и ламентации, како и рикање („гроулинг“) и врескање („скриминг“) кои се карактеристични за скандинавскиот етно-метал. Меѓу мрачните долгокоси младичи со гитари, кои само што не се претвориле во мечеви, девојката навистина остава силен впечаток. Групата полни концертни сали, настапува како главна група на многу фестивали, а нивните спотови на Јутјуб само на официјалниот канал на групата ги имаат видено милиони Интернет-корисници.

На прашањето од каде ја црпи инспирацијата за она што го компонира, Марија обично одговара дека не слуша никаква музика и дека не чита книги, туку дека само живее во допир со шумската природа на родниот крај. Зборовите и идеите ѝ ги шепоти генетската меморија, гласовите на далечните предци и врлата словенска крв која тече низ нејзините вени. Но, Маша сигурно се шегува: групата создава мошне квалитетен и оригинален музички производ кој убаво се вклопува во формата на европската хеви-метал сцена, а текстовите им се прилично добро стилизирани за да потсетуваат на руските епски песни и старите сказни, така што многу поклоници на нивното творештво се уверени дека групата изведува народни, а не авторски песни.

Руска реч на македонски за Вас издвојува две сосема различни композиции на оваа група. „Слава ти, Русијо“ е мелодична и певлива, потсетува на народните патриотски песни и таа е своевидна хеви-метал химна на стара Русија. „Ој, Роде, ој“ е класична хеви-метал композиција со неколку етнички мелодиски линии и инструментална интерполација. Тоа е молитва на старите Руси, упатена на богот Род.

Сите права ги задржува „Росијскаја Газета“.