Патријархот московски и на цела Русија Кирил во понеделникот, 27 јули, упати писмо до претседателите на Русија и Украина, Владимир Путин и Петро Порошенко, во кое ја изрази длабоката загриженост на Руската православна црква поради случувањата на истокот на Украина, соопшти прес-службата на рускиот патријарх.
„Потпишувањето на мировната спогодба во Минск ја запре ескалацијата на конфликтот и влеа надеж за целосен прекин на огнот меѓу завојуваните страни. За жал, иако во помала мера, воените акции продолжуваат до ден-денес. Во Украина се пролева крв и гинат луѓе“, рече патријархот Кирил.
Тој истакна дека најмногу се загрозени постарите лица, децата и инвалидите. „Немаат сите сила и можност да ги напуштат родните места. За жал, во вакви страшни услови не опстојуваат сите. Некој гине во престрелки, а некој од глад, недостиг на лекови и елементарни услови за живот“, истакна поглаварот на Руската православна црква.
Според неговото мислење, само со целосно запирање на воените акции, имплементација на Минската спогодба и водење директен дијалог меѓу спротивставените страни можно е да се обезбеди за цивилното население безбеден живот. Паријархот Кирил од името на РПЦ им се обрати на лидерите на Русија и Украина апелирајќи до нив „да ги вложат сите напори за да престане крвопролевањето“.
Сите права ги задржува „Росијскаја Газета“.