Денешната прес-конференција на Путин беше искористена и за прашања по повод состојбата во Сирија. Новинарот на Associated Press, изрази загриженост Русија да не биде меѓународно изолирана, со оглед на тоа што нејзиниот став, по повод ситуацијата во Сирија, е спротивен од ставот на западот.
Западот е јасен - Башар Асад мора да замине од власт, а различниот став на Русија би можело да доведе до меѓународна изолација.
На ова Путин одговори: „Дали Русија ја загуби својата позиција по повод состојбата во Либија?“ Состојбата и после интервенцијата, смета Путин не е подобра, туку напротив - полоша. „Државата се распаѓа, се води клановска, племенска војна. Резултатот - трагедија, убиство на амбасадорот на САД.“ - рече Путин.
И тоа, според него е резултат токму на таквата западна политика. Русија не е загрижена за режимот на Асад, туку за судбината на Сирискиот народ, првенствено - додаде Путин. „Ние разбираме што се случува таму, промените се потребни - едно семејство е на власт 40 години“, рече тој, со што уште еднаш потврди дека сирискиот режим полека ја губи поддршката и од Русија.
„Ние се залагаме за таква опција која ќе ја спаси земјата од колапс и непрекината граѓанска војна. Нашиот предлог е да се осигура безбедноста, а дури потоа да се размислува за промена на власта“ - рече Путин.
На крајот на краиштата, како што заклучи Путин: „За судбината на Сирија, мора да си одлучат самите граѓани на Сирија.“
Сите права ги задржува „Росијскаја Газета“.
Претплатете се
на нашиот билтен!
Добивајте ги најдобрите стории на неделата директно во вашето сандаче